تورغر: پولیس گاڑی حادثے میں ڈرائیور سمیت 11 اہلکار زخمی، 3 کی حالت تشویشناک
تورغر : ضلعی ہیڈکوارٹر جدباء کے قریب چیر روڈ پر ایک افسوسناک حادثہ پیش آیا، جہاں پولیس کی گاڑی گاؤں چیر جاتے ہوئے اچانک حادثے کا شکار ہوگئی۔
حادثہ شام 4 بجے پیش آیا، جس کے نتیجے میں ڈرائیور سمیت 11 پولیس اہلکار زخمی ہوگئے، جن میں 3 کی حالت تشویشناک بتائی جا رہی ہے۔
حادثے کے فوری بعد تھان جدباء کے ایس ایچ او بمعہ پولیس نفری ریسکیو 1122 ٹیموں اور پاک فوج کے جوان اور بڑی تعداد میں مقامی لوگ جائے وقوعہ پر پہنچ گئے اور زخمیوں کو طبی امداد فراہم کرنے میں مصروف ہوگئے۔ زخمیوں کو ابتدائی طبی امداد کے لیے بی ایچ یو جدباء اور الزیب میڈیکل ہیلتھ سینٹر جدباء میرہ گی منتقل کیا گیا، جہاں ابتدائی طبی امداد کے بعد 8 شدید زخمیوں کو مزید علاج کے لیے بٹگرام منتقل کردیا گیا، جبکہ 3 زخمیوں کو تشویشناک حالت کے پیش نظر ایوب میڈیکل کمپلیکس ایبٹ آباد ریفر کیا گیا۔
واقعے کی اطلاع ملتے ہی ایس ایچ او تھانہ جدباء ثاقب فراز پولیس نفری کے ہمراہ جائے حادثہ پر پہنچ گئے۔ ڈی پی او تورغر سید مختار شاہ، ڈپٹی کمشنر تورغر انور زیب خان، ایس پی انوسٹی گیشن شاہ نواز خان، ڈی ایس پی ہیڈ کوارٹر فیصل خان اور دیگر حکام بھی موقع پر موجود رہے اور امدادی کارروائیوں کی نگرانی کی۔
امدادی اہلکاروں نے 10 زخمیوں کو فوری نکال لیا، جبکہ ایک پولیس اہلکار تاج نواز گاڑی کے نیچے دب گیا تھا۔ ریسکیو ٹیموں پاک آرمی کے جوانوں اور ایس پی انوسٹی گیشن ایس ایچ او تھانہ جدباء اور پولیس اہلکار اور عوام نے ایک گھنٹے کی جدوجہد کے بعد ایسکویٹر کی مدد سے انہیں بحفاظت نکال لیا۔ اطلاعات کے مطابق، اس اہلکار کی ٹانگ میں فریکچر ہوا ہے اور اسے فوری طور پر اسپتال منتقل کر دیا گیا۔
واقعے کے بعد حکام نے حادثے کی وجوہات جاننے کے لیے تحقیقات کا آغاز کردیا ہے۔ ابتدائی اطلاعات کے مطابق، اصل وجوہات کا تعین تحقیقات مکمل ہونے کے بعد کیا جائے گا
یہ افسوسناک واقعہ پورے علاقے میں تشویش کا باعث بنا ہے،
No comments:
Post a Comment