KPCWS Meeting

 خیبر پختونخوا کمیشن برائے وقارِ خواتین (KPCSW) صوبے بھر میں خواتین اور بچیوں کے خلاف تشدد کے بڑھتے ہوئے اور تشویشناک واقعات پر گہری تشویش کا اظہار کرتے ہوئے ہر قسم کے صنفی بنیادوں پر تشدد کی شدید الفاظ میں مذمت کرتا ہے۔ گھریلو تشدد، زیادتی، زیادتی کی کوشش، بچوں کے ساتھ جنسی زیادتی، اغوا، ہراسانی، غیر قانونی حراست، غیرت کے نام پر جرائم اور خواتین کے بنیادی انسانی حقوق کی ہر قسم کی خلاف ورزی ناقابلِ قبول ہے اور ایسے جرائم میں ملوث عناصر کے خلاف قانون کے مطابق سخت کارروائی ناگزیر ہے۔

خیبر پختونخوا کمیشن برائے وقارِ خواتین اپنی ضلعی کمیٹیوں برائے وقارِ خواتین (District Committees on the Status of Women - DCSWs) کے ذریعے خواتین اور بچیوں کے خلاف تشدد کے واقعات پر بروقت کارروائی، متاثرین کی معاونت، متعلقہ اداروں کو ریفرل، اور ضلعی انتظامیہ، پولیس و دیگر اداروں کے ساتھ مؤثر رابطہ کاری کے ذریعے اپنے قانونی اور ادارہ جاتی فرائض انجام دے رہا ہے۔گزشتہ چار ہفتوں کے دوران پشاور، نوشہرہ، مردان، لوئر دیر، ٹانک، خیبر، ایبٹ آباد اور سوات میں مجموعی طور پر 16 مقدمات پر کارروائی کی گئی۔ ان واقعات میں گھریلو تشدد، زیادتی، زیادتی کی کوشش، بچوں کے ساتھ جنسی زیادتی، اغوا، ہراسانی، غیر قانونی حراست، خاندانی تنازعات اور مشتبہ قتل جیسے سنگین معاملات شامل تھے۔ضلعی کمیٹیوں نے ان مقدمات میں ڈپٹی کمشنرز، ضلعی پولیس افسران، ہسپتالوں، چائلڈ پروٹیکشن اینڈ ویلفیئر کمیشن، دارالامان، محکمہ سوشل ویلفیئر اور دیگر متعلقہ اداروں کے ساتھ قریبی رابطہ رکھتے ہوئے بروقت مداخلت، ایف آئی آر کے اندراج، متاثرین کے تحفظ، قانونی رہنمائی، ریفرلز، نفسیاتی و سماجی معاونت، جہاں مناسب ہو خاندانی مصالحت، اور تحقیقات کی مسلسل نگرانی کو یقینی بنایا۔چیئرپرسن ڈاکٹر سمیرا شمس نے ضلعی کمیٹیوں کی بروقت کارروائی، پیشہ ورانہ ذمہ داری اور عوامی خدمت کے جذبے کو سراہتے ہوئے کہا کہ خواتین اور بچیوں کے خلاف تشدد کا ہر واقعہ پورے معاشرے کے لیے باعثِ تشویش ہے۔ انہوں نے اس عزم کا اعادہ کیا کہ خیبر پختونخوا کمیشن برائے وقارِ خواتین ایسے تمام مقدمات کی مسلسل نگرانی جاری رکھے گا.

Dangerous Dogs

 خاموش قاتل دروازے پر

خامہ بگوش

ایم عتیق سلیمانی

ہر سال پاکستان میں اندازاً 2000 سے زائد افراد ریبیز کی وجہ سے جان کی بازی ہار جاتے ہیں۔ لیکن حیرت کی بات یہ ہے کہ ان میں سے 99% اموات روکی جا سکتی ہیں۔

ایک چھوٹا سا کاٹا، 20 منٹ کی لاپرواہی، اور پھر موت یقینی ہوجاتی ہے۔ ریبیز کو ڈاکٹر خاموش قاتل کہتے ہیں کیونکہ علامات ظاہر ہو جائیں تو بہت دیر ہو چکی ہوتی ہے۔

ریبیز وائرس Rabies Virus متاثرہ جانور کے لعاب میں ہوتا ہے۔ جب کتا، بلی یا بندر کاٹتا ہے تو وائرس زخم سے جسم میں داخل ہو کر اعصاب یعنی Nerves کا راستہ پکڑ لیتا ہے۔یہ بہت آہستہ سفر کرتا ہے۔ دماغ تک پہنچنے میں 20 دن سے 3 ماہ کا وقت لگ جاتا ہے۔ اس دوران مریض بالکل ٹھیک محسوس کرتا ہے۔ لیکن جیسے ہی وائرس دماغ میں پہنچا، علامات شروع ہوتی ہیں بخار، پانی سے خوف، روشنی سے ڈر، اور پٹھوں میں کھچاؤ پیدا ہوتا ہے تو اس اسٹیج پر دنیا کی کوئی ویکسین، کوئی دوا کام نہیں کرتی۔ اسی لیے WHO ریبیز کو 100% Fatal once symptomatic کہتا ہے۔

پالتو کتا بھی اگر باہر آوارہ کتے سے لڑے تو وائرس لے سکتا ہے۔ زخم پر مرچ لگانا، دھاگہ باندھنا، یا پیر فقیر کے پاس جانا یہ 20 منٹ صابن سے دھونے سے زیادہ خطرناک ہیں۔

 لوگ سمجھتے ہیں ریبیز ویکسین پیٹ میں 14 ٹیکے لگتے ہیں لیکن اب بازو میں صرف 4 ٹیکے لگتے ہیں۔ دن 0، 3، 7 اور 14 پر۔ بالکل درد نہیں ہوتا۔

 پاکستان کے ہر بڑے سرکاری ہسپتال میں Anti-Rabies Vaccine ARV اور Immunoglobulin بالکل مفت ملتی ہے۔

ماہرین اور NIH اسلام آباد`کے مطابق ریبیز سے بچنے کا فارمولا بہت آسان ہے۔کاٹنے کے 5 منٹ کے اندر زخم کو بہتے صاف پانی اور عام صابن سے 20 منٹ تک رگڑ کر دھوئیں۔ یہ ایک قدم وائرس کا 80% بوجھ ختم کر دیتا ہے۔زخم دھونے کے فوراً بعد اسی دن قریبی سرکاری ہسپتال کے Anti-Rabies Center جائیں۔ ویکسین کا پہلا ٹیکہ 24 گھنٹے کے اندر لگنا سب سے ضروری ہے۔ 4 ٹیکوں کا کورس بیچ میں مت چھوڑیں۔ ایک ٹیکہ بھی مس ہوا تو تحفظ کمزور ہو جائے گا۔یاد رکھیں ریبیز کا علاج نہیں، صرف بچاؤ ہے اور بچاؤ صرف آپ کے ہاتھ میں ہے۔